大妗姐(初)@萬年曆

d燈籠係咪好靚呢~~~?^^ 我在公司發起"一人一燈籠"行動, 每人帶一個燈籠返o黎, 咁就令到個office有d節日氣氛^^ 中秋節快樂呀~~~ 中秋節例牌放3點, 但係冇我份...因為我又要去上大妗姐班, 初班最後一堂 三堂入面...我覺得今堂係最容易架哪! 唔洗讀書, 唔洗記野, 剩係學睇萬年曆, 根據自己/人地o既出生年月日搵番晒d天干地支出o黎 so easy! 後生係唔同d o既~d aunties係咁問我  今堂變左高材生, 哈哈 我五行欠金, 冰姐話我只適合做專業人士, 唔可以做老闆喎~ 之後要等11月先上中班, 因為想揀夜晚班上堂, 我d annual好寶貴架~~ 落堂唔趕時間...又去搭天星小輪:) 今年中秋冇出街, 係屋企過 一來天氣唔好啦...二來...冇乜mood出街, 出親街一定又玩到好夜o既...都係早d訓好 不過依幾日食左好多月餅, 始終都係美心最好味, hee! 祝大家中秋節快樂, 人月兩團圓:)

大妗姐(初)@五行八字

找出你的五行

星期二, 放半日, 又是偷得浮生半日閒的感覺
坐在小巴大窗旁, 感受溫暖的陽光, 正!

今日上冰姐堂, 又學左好多野!
我好認真咁抄notes架~
坐我隔離果個剛好大我12年, 一樣屬鼠
睇唔出佢已經係4個小孩o既媽媽~'o'~
佢話：「梗係啦~我大你12年喎~」
我：「12年都唔會生到4個咁多卦...你真係勁!」
咪好囉, 老來可以享兒孫福^-^
12年後...到底我嫁左未呢?

睇大家寫o既年份, 72~48年都有!
年齡真係唔可以用肉眼睇得出!
有d人已經60歲, 但係個樣似四十到炆五十左右乍
冰姐都係啦, 80歲仲咁後生~
有一個共通點! 就係keep得好o既女人都係快樂的
你見佢地肥肥白白, 嘻嘻哈哈
即使婚姻失敗都會好豁達咁帶過, 生活得好開心
心境開朗就是keep住青春的秘密
做女人都係簡簡單單好
那個年代, 廿零歲o既女人都是等人娶, 相夫教子, 簡簡單單就一世
而家女人廿零歲, 讀書考試工作, 靠男人=冇大志, 擔心冇人要, 女多男少, 美容纖體化妝, 家庭壓力......
簡單邊個唔想?
只係而家依個年代太複雜了

大妗姐(初)@天干地支

天干地支

好快過左上晝, 就去灣仔上堂哪
而家d天氣好好, 熱又唔係好熱, 凍又唔係好凍, 暖暖的陽光, 令人懷念秋季旅行!
好想忙裡偷閒, 請日假去郊外走走

大妗姐班, 如我所料, 全班最細係我, 年紀最輕, 被冰姐選為班長
我同冰姐真係有緣...原來佢一年前對腳要做手術, 足足停左一年冇開班, 佢有好多fans都等左佢好耐
我呢排想報, 就俾我無意係街到見到poster, 仲要係咁平咁筍o既班!
同一個人教, 但係某d學校要收$3800, 真係好幸運!
唔講唔知原來佢已經80歲, 但係一d都唔似!! 好精神, 容光煥發, 講野好有中氣
講真佢個樣似六十乍
問佢有咩心得keep得咁青春, 佢話保持心境開朗, 唔好事事都耿耿於懷, 睇開d, 自然就開心~

今日教天干地支五行, d野好難...好多野記!
雖然好似同我宗教有d衝突, 不過中國傳統婚嫁依d一定要識
你唔一定需要做, 但係點都要知道係咩一回事, 老人家都係求安心o者
我覺得依d野終歸都只係統計學, 流傳幾千年歷史, 總有原因o既
不過冰姐好串架, 如果你講錯一句說話得罪佢, 佢就會講足成堂, 完全唔俾面, 令你down到爆...
同埋佢唔鍾意我地問野, 因為問野會阻住佢教, 佢會好炆架
好多人奉承佢, 擦佢鞋...女人係要tum, 老人家更加要tum...但都唔洗咁出面卦....